Oleh : Jibun
Sabanta lai akan diado-an alek untuak mamiliah kapalo daerah dikasado bagian negara antah baranta atau kini disabuik negara konoha. Karano alek ko alek gadang banyak nan ikuik sato.Lalu apak awak bacarito kecek nyo ado apak tu manjadi calon nan punyo parangai jo tabiat nan kurang elok. Mako apak wak mangecek an ado sapuluah parangai jo tabiat nan kurang elok manjadi alasan untuk indak mamiliah apak tu.
Nan partamo, apak tu sampilik kariang alias saku bajaik,kalau apak tu makan dikadai lontong sarapan pagi,apo lai makan siang atau makan malam,kalau alah salasai makan apak tu inyo bayia sajo untuak inyo surang, ndak ado basa jo basi ka urang lain.
Walaupun urang sakadai kawannyo sadonyo atau samalam baru salasai rapek basamo, inyo ndak paduli. Kok pai basamo-samo jo apak tu acok talampau makan siang. Paruik ala litak tatapi apak tu indak juo baranti di rumah makan. Makonyo kalau pai bajalan jo apak tu duo barang tasadio, Promag (kalau naiek asam lambuang) jo Okky Jelly Drink (minuman panahan lapa).
Kecek apak wak, apak tu mambuek kacio durum. Kacio durum apak tu alun panuah mako pitih sadonyo untuak kacio durumnyo.
Nan kaduo, apak tu palalok sanjo. Kalau ala jam 4 sanjo pintu paga ala tatutuik, apo lai jam 9 malam lampu rumah dinas ala mati. Bak a inyo kamanjadi kapalo daerah nan banyak masalah jo kegiatan.
Sabagai kapalo daerah tiok sabanta urang datang mulai dari urang dinas, tamu-tamu urang pantiang sampai rakyaik badarai minta pandapek, mancari jalan kalua dari masalah-masalah nan indak baranti-ranti sahinggo indak ado jam dinasnyo.
Jikok apak tu jadi kapalo daerah datang urang ka rumah dinas di lua jam dinas, manjawek anak buah Beko tu mah,”Apak Lah Lalok jo Ibuk,Indak Mungkin di Gaduah Lai”.Yo malang nasib dapek kapalo daerah palalok sanjo ka ma nasib kadikadukan,ibaraik bisu barasian.
Katigo apak tu panduto , dulu nyo agiah salah satu anak buah nyo duo ikua jawi, dek anak buah nyo diminta dunsanaknyo mamaliharo.Bak ibaraik pepatah”Mujua Sapanjang Hari,Malang Sakijok Mato”.Kini lah malang indak dapek ditulak.
Jawi nyo nan ciek mati nan ciek lai sakik, lalu jawi nan sakik dijua dek anak buahnyo, dari pado mati ndak basiso “Pado Takubua Bia Taereang”. Dek kurang sanang jo induak samang anak buahnyo ala kalua karajo.
Sajak anak buah kalua karajo inyo kecek an ka urang kampuang tu bahaso nyo jawi tu untuk kalompok tani bukan untuak anak buahnyo tapi kalompok tani. Mako urang kampuang nan bagabuang jo kalompok tani tu maminta jawi ka bakeh anak buahnyo.
Mandanga kaba bak kian mangamuak lah anak buah bakeh ka induak samang, inyo turuik ka rumah dinas induak samang tu jo urang kampuang, bia siang nan bak ari, saroto tarang nan bak bulan. Ala tibo bakeh anak buah jo urang kampuang indak tantu ka jaweknyo, karano lain nan disampai-an ka bakeh anak buah lain pulo ka urang kampuang.
Sasudah di adok-adok an indak talok manjawek dek induak samang. Sahinggo urang kampuang mamintak maaf ka bakeh anak buah apak ko. mako urang kampuang bakato “Yo Panduto Apak Tu Kironyo”,kito sakampuang di adu dombanyo.
Kaampek, apak tu manyusu ka etek nyo, karano sado pitih kampanye nyo dari etek nyo, kabanyo etek nyo akan mangaluakan pitih sabanyak-banyak untuk pilkada ko, bara paralu etek agiah. 20 milyar sampai 30 milyar, sampai kaba nan bapesong tigo ratui ribu per-kapalo,kapalo urang di daerah tu hanyo 300 ribu haragonyo.
Mako apak tu yakin manang karano bapikiah kapalo urang bisa di bayia kasadonyo. Etek nyo nan mambayia kabutuhan mako inyo patuah bana ka etek nyo, apo kecek etek itu pulo kecek apak tu.
Maka katiko apak ko manjadi kapalo daerah sabananyo etek nyo lah nan sabana kapalo daerah. Mako visi misi apak tu “kapalo daerah sasuai parintah etek”.
Kalimo,apak tu payah bana dihubungi, kalau awak manelpon indak diangkeknyo do, jiko ma WA indak pulo dibalehnyo. Kalau basuo inyo icak-icak ndak tau sajo. mungkin Kecek apak tu urang manelpon jo ma WA hanyo mamintak pitih sajo mako indak paralu di jawek, ko paralu bisuak jo nan manelpon jo ma WA tu agiah pitih habis pakaro.
Ka Anam, apak tu mangaku sayang ka kaluarga nyo. Sayang ka kaluarga nyo inyo posting di media sosial mulai dari facebook, instagram sampai ka tiktok. Tapi sayang nyo yang posting tu hanyo bini baru nyo. Dulu apak ko pernah manikah dan bacarai. Tapi anak-anak yang dari parnikahan sabalumnyo ndak pernah inyo posting do. Saharusnyo kalau apak tu mangaku sayang ka kaluarga posting sadonyo anak-anaknyo, anak sambuangnyo dan bini baru nyo. Karano keluarga tu sacaro umum dicaliak apak, mandeh dan anak bukan sajo laki jo bini.
Katujuah, apak tu ala tabukti indak pandai mamimpin. Di agiah inyo mamimpin partai ditingkek daerah, mamakiak sabalik anak buah, sampai anak buah mambuek surek ka pusat, memintak ka urang pusat tolong ganti jo nan baru. Siasek punyo siasek apo garangan tajadi, karano apak ko mangecek ka anak buah. “ambo indak ka mambatu sapeserpun pitih saksi”, sudah tu apak tu sampaikan “ambo datang indak bapartai bisa juo jadi pajabat”. Mandanga kato bak kian aia diminum raso duri, nasi makan raso sakam. Sajak itu banyak urang nan apak pimpin di partai mulai malawan. Bakato anak buah ala indak manyumbang kasa pulo.
Kadalapan, apak tu indak talok bataruih tarang atau panakuik. Mambaok oto di pemerintahan ado supir ado stokar, apak tu adolah stokar. Sabagai stokar apak tu acok manyampaikan supir nan kini kurang pandai mambaok oto, mako apak tu nio pulo jadi supir, kalau ambo yang dipicayo jadi supir oto tarawat dan panumpang sanang bak itu janjinyo. Carito manjadi stokar manjadi supir, sampai ka talingo supir. Bahimbauan ka stokar jo bininyo untuak makan malam dek supir jo bininyo. Mukasuik makan malam ko untuak saliang manjalehan apo nan tajadi, sahinggo kok ado “kusuik nak nyo salasai,karuah nak nyo janiah”.
Dijawek di stokar jadi sasudah Isya kami si nan. Ala ditunggu dek supir jo bininyo karano ndak datang ditalepon lah, taleponnyo mati. Mako sambah nan dimasak, dek bini supir inyo antaan ka rumah stokar tu, sajak itu putuih komunikasi antaro supir jo stokar. Pamimpin ndak buliah hanyo mangecek di balakang tapi barani baadok-adok-an.
Kasambilan,apak tu lebay, bacarito kasuok ka kida,awak sabagai stokar lah taniayo dek sopir,nan awak lai Samo sapajalanan tapi indak diagiah karajo walaupun gaji tetap manarimo,kok ditanyo ka sopir oto”Manga stokar indak baagiah karajo”?dijawek dek sopir satu,”lain nan disuruah,lain Pulo nan Inyo karajaoan,kakida kecek awak,kasuok kecek Inyo.Awak Sadang mambaok panumpang isinyo panuah,Jan dek gara-gara stokar nan indak Tantu kadikarajoannyo jatuah oto kangarai dalam,itu makonyo stokar indak diagiah karajo”.
Kasapuluah, apak tu indak punyo kawan, kecek apak wak manga apak tu indak punyo kawan?karano apak tu hanyo mamikian dirinyo surang. Sampai ado urang bakato “Kalau ingin urang balawanan apak tu, suruah dakek-dakek dulu, beko urang tahu surang parangainyo”. Urang nan bakarajo jo inyo pai sadonyo, tiok mandakek jo urang tiok bamasalah.
Kok tanyo urang ka apak tu manga urang pai dari inyo, apak tu manjawek “kandaknyo banyak bana ndak talok dek ambo mangabulkan”, Apak tu nan ndak pandai manari lantai pulo ba kecek an nan bagoyang, apak tu nan ndak pandai bakawan urang pulo nan basalahan.Sabanyak tu parangai apak tu ha…….Kito hanyo ma ingek an,bana jo salah tapulang ka dunsanak kasadonyo,”Kito sarahan ka aia nan janiah,sayak nan landai”.””
#Ditulis Oleh Kores Ponden Mentreng.com
